Filmfjes

Norske Karen Winther vann nett heile tre prisar for den personlege dokumentarfilmen Exit på DOK Leipzig, ein av dei eldste og viktigaste dokumentarfilmfestivalane i Europa. Winther kjem heim med Gedanken-Aufschluss-Preis, Dokumentarfilmpreis des Goethe-Instituts og Young Eyes Film Award. Ho skildrar den vanskelege og farlege vegen ut av valdelege grupper for ei rekkje tidlegare ekstremistar av ulik art. Filmen har blitt vist på fleire norske festivalar og ligg no på NRK.

H.T.

Sjå på nett no

(NRK) Vi menneske utslettar artar i ein forrykande fart om dagen. Ikoniske nashorn og elefantar blir skotne i hopetal og står i fare for å forsvinne. Doku–mentarfilmen De siste av sitt slag (The Last Animals) av Kate Brooks følgjer vitskapsfolk og dyrevernarar som freistar hindre krypskyttarar i Afrika, avsløre ulovleg sal av elfenbein i Asia og endre lover verda over. Filmen er viktig, vakker og opprivande, og han har vunne eit lass med prisar.

H.T.

Tre på topp

Finurlege drama fungerer best viss dei faktisk heng på greip, slik som desse tre:

Short Cuts (1993). Ikkje alt Robert Altman har teke i, har vorte til gull. Men med denne er han reinaste kong Midas.

Amores Perros (2000). Alejandro G. Iñárritu har heldigvis halde på fascinasjonen for intrikate drama, også etter denne strålande langfilmdebuten.

Magnolia (1999). Eg gler meg til Paul Thomas Anderson skal laga ein ny, like god film som denne.

B.A.