Filmfjes

Sist helg gjekk Asian Film Awards 2018 av stabelen i Macao i Kina. Sylvia Chang skein. Ikkje berre vart ho kåra til beste kvinnelege skodespelar for rolla i Love Education, som ho sjølv har regissert og skrive. Ho fekk òg ein pris for livslang innsats. Her heime er den taiwanske stjerna kjend for roller i Spis, drikk, mann, kvinne og Bryllupsfesten av Ang Lee. Prisen for beste film gjekk til Youth av Feng Xiaogang, som Hollywood Reporter kallar «Kinas Spielberg».

H.T.

Sjå på nett no

(mubi.com) Strøymetenesta Mubi set kvalitet framom kvantitet. Ein finn alltid gull blant dei tretti titlane der. Som dei fleste veit, har Venezuela i ei årrekkje levd i skrikande krise økonomisk, sosialt og politisk. Langt frå krigsfontane finn du den stillferdige filmen La Soledad av Jorge Thielen Armand. Den unge regissøren skildrar krisa gjennom folk som står han nær i eit landskap mellom dokumentar og spelefilm med vakre bilete og var handsaming av kompliserte sosiale problem.

H.T.

Tre på topp

Eg har ikkje fått sett meg opp på påskekrim, så eg noterer her kva for nokre eg har mest tru på (ja, dei er sjølvsagt nøydde til å vera britiske):

Collateral (Netflix) Krim av typen «kven gjorde det?». Det verkar i tillegg som denne har politisk undertone, noko me har godt av i desse dagar. Eller vondt av.

Shetland (NRK) Dette er sesong 3 her i Noreg, men handlinga går føre seg på Vestlandet, som er meir enn god nok grunn til å sjå på.

Vikaren (NRK) To episodar berre, men ser lovande ut på ein sånn psykologisk thriller-måte. Det blir ikkje påske utan!

B.A.