Filmfjes

Sist helg smadra Black Panther av Ryan Coogler tidlegare publikumsrekordar for februar og helger knytte til presidentdagen i USA. Variety melder at filmen basert på Marvel-teikneserien spelte inn 218 millionar dollar, mot rekorden til Deadpool på skarve 152 millionar i 2016. Coogler viste med Creed i 2015 at han kan kombinere det kommersielle med kvalitet. Black Panther er ein estetisk godtepose med mykje afrofuturisme og fleire flotte figurar. Han kjennest forfriskande i den endelause rekkja av superheltfilmar som dominerer kinoverda om dagen.

H.T.

Sjå på nett no

(Filmgrail) Om du saknar Rolv Wesenlund og har gode minner frå Norske byggeklosser frå 1972, må du for all del ikkje la deg freiste av filmen med same namn som kjem på kino no. Den nye versjonen er eit fantasilaust makkverk av tynnslitne stereotypar. Gå heller til næraste bibliotek og lån originalen, eller logg deg inn på nettet. Du finn ablegøyene til den folkekjære komikaren på ei rekkje filmsider.

H.T.

Tre på topp

Om du likar røysta til Harry Dean Stanton, kan du sjå han synga i fleire filmar, for eksempel desse tre:

Cool Hand Luke (1967) Kan det ha vore denne fengselsfilmen som inspirerte Johnny Cash til opptredenar i San Quentin og Folsom Prison?

Twin Peaks (2017) Her spelar Stanton «Red River Valley», same song som blir brukt som lydspor i Lucky.

Paris, Texas (1984) Wim Wenders visste å setja pris på Stantons forkjærleik for mexicanske balladar, her representert med «Cancíon Mixteca».

B.A.