Roman

Jens Chr. Ness:

Det tapte paradis

Bind 1: Den gylne parykken

Gyldendal

I Den gylne parykken er det orkan i kasta, både i bokstavleg og overført tyding. Som lesar blir du slengt veggimellom: frå ung forelsking til desillusjonert gammalmannsprat, frå greske mytar til sjørøvarskrøner, frå levande døde til vitskaplege slutningar.

Boka er først band i trilogien Det tapte paradis av Jens Chr. Ness. Året er 1653. På ein tobakksplantasje i Vestindia må slavejenta Medea sjå på at mor hennar, Ariadne, vert hengd. Den unge arvingen Jonah rømmer til skogs med bøkene sine. Her vert han kidnappa av ein forlist styrmann og det snakkande skipsskroget Argo.

Den gylne parykken låner og leikar med den greske legenda om det gylne skinnet. Forfattaren kryssklipper historia saman mot eit dramatisk og velregissert høgdepunkt.

Lesarane i målgruppa har lang fartstid på dei sju hav. Først saman med kaptein Sabeltann og seinare i fylgje med den meir burleske og morosame kaptein Jack Sparrow.

Den gylne parykken seglar i kjent, populærkulturelt farvatn. Når lesaren finn knaggar å henge forteljinga på, vert det lettare å stå i stormen gjennom 378 sider utan at lesaropplevinga forliser.

135 år etter at Robert Luis Stevenson skreiv Skatten på Sjørøvarøya, syner sjangeren framleis stor slitestyrke. Då som no er det når tvisynet og den indre kampen i menneska vert skildra, at det er god litteratur. Elles er det god underhaldning.

Janne Karin Støylen

Janne Karin Støylen er litteraturvitar og bonde.