Vinjar samfunnshus,
fredag 6. april

– På same areal som Vinje kommune bur det 50 millionar menneske i Hongkong, Singapore og andre storbyar i Austen, sa ordførar Jon Rikard Kleven (Sp) i opningstalen til festivalen i Vinjar, samfunnshuset i Vinje.

Vinje kommune er på om lag 3000 kvadratmeter og har 3700 innbyggjarar. No var det ei ekstrem jamføring ordføraren la opp til, men kontrasten fortel mykje om Vinje. Det fortel om utfordringar under festivalen, og utfordringar som Vinjesenteret må bryne seg på i framtida.

Folketettleiken i Vinje kommune er låg: 1,2 innbyggjarar per kvadratkilometer, mot landsgjennomsnittet på 14,1. Berre 15 prosent av innbyggjarane bur i tettbygde strok. Kommunesenteret Åmot har 654 innbyggjarar. Vinje kommune er større enn heile Vestfold fylke, på ca. 2200 kvadratmeter. Vi kan jamføre med Ulvik herad, som eg nemnde i hovudteksten. Ulvik er òg ein stor kommune med få innbyggjarar: tusen innbyggjarar, to innbyggjarar per kvadratkilometer, og halvparten bur i Ulvik sentrum. Kanskje det ville vera naturleg òg for Vinjesenteret å satse på aktivitetar i Åmot sentrum?

Eg hadde aldri vore i Vest-Telemark før, Noregs kulturelle vogge. Eg tenkte det var ei lett sak å ta inn på næraste hotell og spasere inn til Vinjar samfunnshus. Men det som ein gong var det næraste hotellet, som låg i Åmot (som slett ikkje ligg i spaseravstand til Vinje), brann for tjue år sidan. Bortsett frå Groven camping hyttegrend ved Åmot er næraste hotell Rauland høgfjellshotell, som ligg om lag 35 kilometer unna Vinje, 40 minutt med bil. Vinjesenteret sette opp buss til deltakarane, men det seier seg sjølv at fire bussreiser på laurdag, opp og ned til seminar på dagtid, og likeins til fest om kvelden, blir i det meste laget. To og ein halv time på buss.