Gunnar Torvund og Phillip Dommen: «Uventa ting skjer»

20. januar–11. mars 2018

Kunsthall Grenland, Porsgrunn

Her møter du overraskande og uventa skulpturar av dei to betydelege telemarkskunstnarane Gunnar Torvund og Phillip Dommen. Merk at det berre er tre dagar att av utstillinga.

Aurora Passero:
«Silvery Actions»

2. februar–13. mai 2018

Vigeland-museet, Oslo

Installasjonane til Aurora Passero er laga spesielt for museet og i dialog med skulpturane og teikningane til Gustav Vigeland. Arbeida er vovne med nylontråd. Nokre minner om skulpturar, andre om måleri.

Mimmi Falsen:
«Et fenomen i sin tid»

14. januar–15. april 2018

Asker museum

Asker museum har ei viktig mønstring av målaren Mimi Falsen (1861–1957) med heile 62 verk. Ho var ein av dei første kvinnene som vart kunstnar på fulltid. Ho skaffa seg ei solid utdanning i utlandet, og ho er utstilt fleire stader i inn- og utland. Falsen er mest kjend for dei slåande portretta sine. Motiva i utstillinga spenner frå portrett til landskap, interiør og blomster. Ho var i full kunstnarleg utvikling gjennom heile livet, og nokre av dei beste arbeida laga ho over nitti år gamal. «Et fenomen i sin tid» er del av ein serie utstillingar med kunstnarar frå Asker og Bærum.

Kjell Erik Killi-Olsen:
«New York 1983»

17. februar–6. mai 2018

Trondheim Kunstmuseum

Utstillinga er eit djupdykk i kunsten Killi-Olsen laga medan han budde i New York i byrjinga av 80-talet. Her får vi sjå store installasjonar, skulpturar og måleri. Det å vere annleis er eit viktig tema for Killi-Olsen. Verka har gjerne overvekt av det groteske, balansert med humor og medkjensle.

Sonya Kelliher-Comb:
«Det vi bærer på»

24. februar–23. september 2018

Kunsthall Svalbard, Longyearbyen

I utstillingsrommet heng mengder av lommer i reinsdyr- og sauehud i lange snorer. Hylsene er vevre, gjennomsiktige og i sterk kontrast til dei kraftige trådane dei heng i. Utstillinga er inspirert av snorer som skal hindre born i å miste vottane sine. Sonya Kelliher-Comb arbeider i Alaska og finn inspirasjon i korleis forfedrane nytta dyrehud, skinn og membranar. Arbeida hennar er særleg tankevekkande når dei vert stilte ut på Svalbard, eit territorium utan urfolk, som har hatt ei internasjonal befolkning i fleire hundre år.

Kunsthall Svalbard opna i 2015. Visningsstaden er del av Nordnorsk Kunstmuseum i Tromsø.

Anne-Kjersti Hermanrud: «Geometriske konstruksjoner»

16. februar–18. mars 2018

Haugesund Kunstforening

Måleria til Anne-Kjersti Hermanrud er bygde opp av strenge, geometriske former. Paletten hennar er like nøktern, ho held seg til gråtonar i spennet mellom svart og kvitt. Verka er ikkje figurative, likevel får ein assosiasjonar til utsnitt av bygningar. Såleis får lerretsflata ein romverkad, der samanstillingane av former vippar mellom ro og uro.