Hallum får Ibsenprisen 2018

Onsdag kveld vart Ibsenprisen for 2018 delt ut i Peer Gynt-salen i Ibsenhuset i Skien. Det er ein gjæv pris, vinnaren får 150.000 kroner og ein statuett av Nina Sundbye. I år går prisen til teaterstykket Solveigs 2. sang av M.H. Hallum. Stykket, som hadde urpremiere på Teater Innlandet i fjor, sirklar kring Solveig frå Peer Gynt og tilhøvet hennar til Peer. Dramatikaren Malmfrid Hovsveen Hallum har skrive ei rekkje verk for ulike scener, og også for NRK Radioteatret. Solveigs 2. sang er eit samarbeidsprosjekt mellom Teater Innlandet og NRK Radioteatret.

Ny leiar for sakprosafestival

I førre veka fekk Norsk sakprosafestival i Oslo ny leiar: Mette Karlsvik. No har systerfestivalen i Trondheim òg fått ny leiar: litteraturvitar Hanna Malene Lindberg. I lag med eit team skal ho syrgje for at festivalen Fakta F går av stabelen som planlagt 2. og 3. november på Litteraturhuset i Trondheim.

«Sakprosa er et veldig interessant felt, med mange linjer på tvers til andre felter i samfunnet. Jeg ser på dette som et opplysningsarbeid, noe for vår allmenne dannelse», seier litteraturvitaren til bok365.no

Seks nye til- sette i Samlaget

Det norske Samlaget har 150-årsjubileum i år. Dei feirar med gjæve utgjevingar, men òg med storinntrykk i bokstova. Bokreiaren har nemleg tilsett heile seks nye medarbeidarar, alle kvende som er glade i bøker: Runa Kvalsund, Maren Ingeborg Hvamstad, Elen Betanzo, Oda Malmin, Katerina Futsæter Vik og Sara Olivia Berntsen. Dei som fylgjer med i den norske bok- og forlagsbransjen, kjenner nok att eitt og anna namn her.

ronny@dagogtid.no