Ikkje mykje av det som går på jernbaneskjener kan måla seg med Bergensbanen, enten det handlar om ingeniørkunst eller naturoppleving.

Det gjer naturlegvis at Innsida ikkje utan vidare lèt seg imponera av togtilbod her og der rundt om i verda. Då Innsida nyleg var på offisiell vitjing til Japan, var det naturleg å ta ein prøvetur med det vidgjetne snøggtoget Shinkansen. På fleire område innanfor togdrift vil Innsida slå fast at japanarane klarar seg godt. Særleg den gode skikken med at konduktøren snur seg og bukkar til passasjerane når han har gått gjennom ei vogn. Forseinkingar er òg noko dei tek alvorleg, svært alvorleg. Dei togkyndige Innsida snakka med, var ikkje særleg nøgde med at Shinkansen var seks minutt forseinka – til saman – i 2016.

Likevel er det ikkje dei kvite hanskane til konduktørane, dei presise rutetidene eller den utrulege farten som imponerer mest. Togmaten i Japan er med dette klart kåra til verdas beste perrongservering. Stasjonane er fulle av ulike kioskar som sel lekre rettar som ein kan ta med om bord. Det er nydelege små matboksar med alt frå fersk sushi til vel-lagra Kobe-biff.