Doping

Ole Bjerke

Lillehammer

Vi kjenner smerta di heilt på botn i oss sjølve. Ei smerte som for deg sikkert var så vond og intens at den kunne tatt knekken på deg. Kva betyr det for dei som vil straffe deg? Ingen ting. Kva gale har du gjort? Her er også svaret: ingen ting. Sola skein på deg og gav deg eit leppesår. Legen i Skiforbundet gav deg ei salve. Skiforbundet har fastsett at utøvarane er forplikta til å følgje råda frå legen. Det gjorde du, Therese. I dine villaste fantasiar kunne ikkje ein tanke om at salva inneheldt dopingmiddel slå ned i deg.

Du er den beste kvinnelege langrennsløparen i verda. Korfor skulle du bruke dop? Du treng ikkje dop for å hevde deg. Mang ein gong går du med det mest suverene drivstoffet som finst, nemleg ekstasen.

Å bli utestengd i 13 månader for ein middelmåtig utøvar betyr lite. Når det same skjer for ein som er på verdstoppen og i sine beste år, er det ein katastrofe.

Antidopingarbeidet blir svekt dersom det skal drivast på denne måten. Det vekker ein sterk motvilje hos vanlege folk som innser at det går an å vera uheldig, og som meiner at den uheldige ikkje skal straffast.

Du, Therese, er fylt med idretts- og livsglede. Du er spontan og sjarmerande. Ingen har styrkt livsgleda i ein idrettsglad nasjon meir enn du. Du fortener ein hjarteleg og varm takk – og ikkje ei meiningslaus straff.

Lykke til vidare, Therese Johaug!