Aslaug M. Juliussen: «Skjæringspunkter»

Nordnorsk Kunstmuseum

20. oktober–31. mars 2019

Skjæringspunkter er den største og mest omfattande presentasjonen av Aslaug M. Juliussen som har vore laga. Her får vi innblikk i eit førti år langt kunstnarskap som framleis er vitalt og aktivt. Juliussen legg stor vekt på materialet ho vel ut for kunstverket. Her møter vi verk av tekstil og tråd, også skinn, horn, hår, stål, glas og bein.

Fleire av verka er sette saman av klauver, horn og andre kroppsdelar av reinsdyr. Mellom anna problematiserer ho kor stor avstand vi moderne menneske har fått til naturen og kroppen, og ikkje minst til døden.

I tillegg til Juliussens kunst vert det presentert verk av sju norske og utanlandske kunstnarar som anten har inspirert eller har fellestrekk med ho.

Marte Johnslien: «A Square on a Sphere»

Lillehammer Kunstmuseum

20. oktober–24. februar

Marte Johnslien (f. 1977) utforskar sider ved naturvitskap, religion, politikk og historie gjennom kunstnarlege metodar. Hol legg særleg vekt på problemstillingar innanfor matematikk: Korleis kan røyndomsforståing omsetjast til romlege strukturar? Utstillingstittelen A Square on a Sphere speler nettopp på at det er uråd å overføre ein todimensjonal firkant til ei tredimensjonal kule.

Uttrykksformene spenner frå skulptur, måleri og keramikk til installasjon, arkitektur og foto.

Siv Bugge Vatne

Møre og Romsdal Kunstnersenter, Molde

18. oktober–17. november

Siv Bugge Vatne stiller ut verk i blanda teknikkar, skulptur og installasjon. Ho er kjend for uventa former, som ikkje er utan lågmælt humor. Det leikne vert kombinert med alvor. Ofte svever formene like over golvflata, eller er balanserte oppå kvarandre på halsbrekkande vis. Dei mange variantane av former som trassar naturkreftene i strevet med å løfte seg opp, har ein inspirerande vitalitet. Ein er alltid litt meir optimistisk når ein går ut frå utstillingane hennar.

Marius Martinussen

KHÅK Kunsthall, Ålesund

3. november–2. desember

Marius Martinussen er kjend for store måleri i ein glatt stil med usynlege penselstrøk. Her er linjene skarpe og motiva abstrakte. Utstillinga i Ålesund er utført i gneistrande fargar og kan gje assosiasjonar til lysskilt og graffiti, så vel som naturelement og lysfenomen på himmelkvelven.

Marianne Berg og Marianne Broch: «Ekko / Innover»

Skulpturar

Hå gamle prestegard

13. oktober–11. november

I utstillinga Ekko / Innover har Marianne Berg og Marianne Broch verk som dannar ein interessant dialog. Marianne Berg (Ekko) viser skulpturar i materiale som tre, kunstharpiks, betong og bronse. Marianne Broch (Innover) skaper verk ved hjelp av fysisk kraft og materiale frå naturen, hovudsakleg tre. I verka hennar ser vi korleis ho arbeider seg innover i treet, til kjernen.