Katrine Giæver: «Dip» og Stein Rønning: «Speil»

23. november 2017–20. januar 2018

Galleri Riis, Oslo

Stein Rønning har vidareutvikla ein skulptur han laga for snart tretti år sidan, og laga ein serie på 25 skulpturar som er vel verde å dvele ved.

Katrine Giæver viser abstrakte måleri og tekstilar. Kunstnarskapet er prega av livlege og kraftfulle fargekomposisjonar. Det er fengslande å sjå korleis ho utforskar samansetninga av fargeflater gjennom ulike teknikkar og material. Bileta spenner frå det sterkt kontrollerte til det meir improviserte.

Lisa Torell, «Potential of the Gap»

12. januar 2018–11. februar 2018

Nordnorsk Kunstmuseum, Tromsø

Svenske Lisa Torell (f. 1972) arbeider med konstruksjonsbaserte tolkingar av byrommet. No har ho laga ei utstilling særskilt for Nordnorsk Kunstmuseum. Mellom anna har ho lagt eit fortau av asfalt gjennom utstillingslokalet. Med dette spør ho kvifor vi tek det som ei sjølvfølge at funksjon skal kunne overstyre estetikk. Legg vi i det heile legg merke til omgjevnadene våre?

James Turrell: «Hardanger Skyspace»

Tre dagar i veka, året rundt

Kunsthuset Kabuso, Øystese

Den amerikanske lyskunstnaren James Turrell har laga permanente lysinstallasjonar verda over, kvar og ein spesielt utforma for staden. Hardanger Skyspace er berre open i samband med soloppgang og solnedgang nokre dagar i veka. Innvendig er det benkar, og ein times tid kan du sjå opp mot den store opninga i taket og nyte korleis tusenvis av LED-lys smeltar saman med dagslyset i storslagne illusjonar. Lysinstallasjonen endrar karakter etter årstid og klimatiske tilhøve. Såleis vert alle framsyningar forskjellige.

Du finn opningstidene på nettsida hardangerskyspace.no.

«Bending the Frame»

15. oktober 2017–4. mars 2018

Preus museum, Horten

Korleis kan bilete utgjere ein forskjell? Internett og sosiale medium har ført til at nyhende, meiningar og fotografiske uttrykk vert spreidde på nye måtar og tek nye former. Utstillinga Bending the Frame utforskar rommet mellom dokumentar- og kunstfotografi, og stiller mellom anna spørsmål ved om kunsten har overteke rolla som kritisk stemme i samfunnsdebatten.

I tillegg til det som er vist i museet, er plakatutstillinga #WomenMatter av #Dysturb klistra opp i gatene i Horten.

Kristin Tårnesvik: «Feltarbeid»

7. desember 2017–25. februar 2018

Ä’vv Skoltesamisk museum, Neiden

Det vesle museet Ä’vv opna i juni 2017. Dette er eit historisk museum med eitt areal for skiftande utstillingar. For tida viser dei ei utstilling av Kristin Tårnesvik (f. 1964). Kunstnaren er frå Kåfjord i Nord-Troms, men bur og arbeider i Bergen. Utstillinga består av tjue penneteikningar av linjalrette linjer i ulike retningar. Dei er sette saman til eit monumentalt verk, der strekane frå kvar teikning glir over i dei kringliggande arka. Saman dannar teikningane eit bølgande rytmespel.

Sverre Bjertnæs og Bjarne Melgaard: «Nye grafiske arbeider»

14. januar–25. februar 2018

Galleri Ismene, Trondheim

Sverre Bjertnæs og Bjarne Melgaard viser heile fire utstillingar ulike stader i januar. I Galleri Ismene stiller dei ut så mange som 50 grafiske verk som dei har skapt i fellesskap. Verka er figurative, smidde saman av dei uttrykksfulle, brutale formene til Melgaard og dei meir klassisk orienterte teikningane til Bjertnæs i tynne, sikre linjer.