Meir nynorsk sakprosa for barn

Talet på nynorske faktabøker for barn er firedobla i løpet av dei siste to åra, frå tre utgjevingar i 2015 til minst tolv i 2017. Det syner tal magasinet Pirion og nyhende- og debattavisa for unge, Framtida.no, har henta inn frå dei største forlaga. Samlaget står bak ti av utgjevingane i år, medan Gyldendal har gjeve ut to faktabøker på nynorsk i 2017. Samlaget har planar om sju nye sakprosautgjevingar for barn til neste år, medan Gyldendal førebels har planar om å gje ut éi sakprosabok på nynorsk i 2018.

Lokale bøker under treet

Posisjonen til lokalbøkene har vorte svekt i det kjededominerte bokhandlarmarknaden, men lokalboka er langt frå død, melder nettstaden BOK365. I Tynset bokhandel og Aksdal Bok og Papir var det lokale utgjevingar som toppa salslistene før jul. Årbok for Nord-Østerdal var den mest selde boka på Tynset, der òg halvparten av topp 20-lista var utgjevingar frå lokale forfattarar og foreiningar. Hjå Aksdal Bok og Papir låg den lokale Vindetreet 2017. Sogeskrift for Vindafjord på salstoppen.

Forfattarar kan tape på brexit

Amerikanske forlag kan verte større konkurrentar for britiske forlag når Storbritannia går ut av EU. I dag har britiske forlag eksklusive rettar i Europa som følgje av EU-medlemskapen, seier Nigel Newton, som er konsernsjef for Bloomsbury – forlaget som har sendt Harry Potter-bøkene ut i verda.

– Når Storbritannia ikkje lenger er del av Europa, er det mogleg det vert ein meir delt marknad med amerikanske forlag. Det er eit potensielt problem at fleire amerikanske utgåver av bøker då kan kome inn på kontinentet.

eva@dagogtid.no