I juni 1954 er Sam Phillips på Sun Records i Memphis i fyr og flamme over ein demo av balladen «Without You» med ein namnlaus svart songar frå Nashville. Han var ikkje å oppdrive, men kva med å få tak i han med kinnskjegget? Kompanjongen Marion Keisker hadde året før fått gåsehud av plata som attenåringen Elvis Presley spelte inn som gåve til mora. Marion hadde telefonnummeret hans.

Phillips, som hadde stor suksess med svarte artistar, leita etter ein kvit mann som kombinerte R&B, pop og country. Marion fekk så vidt lagt på røret før Elvis var i studio, og sjølv om han ikkje fekk til søtleiken frå demoen, fekk han studiotid 5. juli 1954 saman med Scotty Moore på elgitar og Bill Black på kontrabass. Elvis på rytmegitar. Ingen trommer.

I ein pause tok Elvis til å improvisere ein uptempo-versjon av «That’s All Right, Mama», utgitt på singel i 1947 av bluesmannen Big Boy Crudup. 19. juli 1954 kom Elvis-plata ut med «That’s All Right» kreditert Arthur Crudup. Han blei stjerne over natta i Memphis, og Elvis var på veg til å bli King of Rock And Roll.

I 2017 blei det kjent at Jimmy Sweeney (død 1992) var songaren på «Without You». Han song Elvis før Elvis song Elvis.

Øyvind Pharo

Øyvind Pharo er litteraturvitar, musikkskribent og DJ.