Paul Simon får berre ros for den ferske plata Seven Psalms. Slik gjekk det ikkje då han spelte inn Graceland i Sør-Afrika under kulturboikotten av apartheidstaten. Han var blitt hekta på sørafrikansk vokalmusikk med påfallande likskap med den afroamerikanske doowop-stilen han sjølv voks opp med: fleirstemde arrangement med bassongar som markerte rytmen, og frontvokalisten som song falsett.

A capella-gruppa Ladysmith Black Mambazo fekk eit internasjonalt gjennombrot med Graceland. Dei hadde sunge i den lokale mbube-stilen oppkalla etter songen «Mbube» som i 1939 blei spelt inn i Johannesburg av Solomon Linda & The Evening Birds. Linda selde rettane til plateselskapet Gallo for tilsvarande to britiske pund etter dagens kurs. Ti år etter hadde plata selt i 100.000 eksemplar. Pete Seeger og The Weavers tydde zulurefrenget uyimbube («du er ein løve») som wimoweh, og dette blei tittelen på hitversjonen i USA. I 1961 fekk han engelsk tekst og tittel. «The Lion Sleeps Tonight» gjekk heilt til topps på Billboard.

Tallause har spelt inn songen, men då Walt Disney Company brukte han både i The Lion King-filmen og musikalversjonen utan royalty til etterkomarane, gjekk dei til sak, og gamal urett blei omgjord. Netflix-dokumentarfilmen The Lion’s Share frå 2019 fortel historia.

Øyvind Pharo