I 1979 var Briefcase Full of Blues, debutplata til The Blues Brothers, den mestseljande LP-en i USA. Filmen frå året etter etablerte universet til dei foreldrelause kvite bluesbrørne Joliet Jake og Elwood Blues, draumeroller for John Belushi og Dan Aykroyd.

Bandet slo igjennom i TV-showet Saturday Night Live, dei to i front inspirert av Sam & Dave og John Lee Hooker.

Sistnemnde var med i filmen, som Ray Charles, James Brown, Aretha Franklin og Cab Calloway. Alle desse gjorde comeback gjennom filmen.

Ramma i filmen, i regi av John Landis, er at den katolske skulen der Jake og Elwood voks opp, er truga med nedlegging om han ikkje betaler gjelda si til skattevesenet i Chicago. Dermed er dei ute på «a mission from God» for å samle det oppløyste Blues Brothers og spele til inntekt for barneheimen.

Boka The Blues Brothers av Daniel De Visé fortel om «korleis ein amerikansk filmklassikar blei til». Nerven i forteljinga er likevel venskapen mellom Belushi og Aykroyd.

Blueskjærleiken foreinte dei to komikarane, men kokain tok livet av John Belushi. Han blei 33. På gravsteinen står det «I may be gone. But rock and roll lives on». Det gjer også Blues Brothers, både bandet og filmen. Og no dokumentert i ei anbefalt bok.

Øyvind Pharo

Øyvind Pharo er litteraturvitar, musikkskribent og DJ.