Jazz

Flukten:

Flukten

Hanna Paulsberg, saksofon; Marius Klovning, gitar; Bardur R. Poulsen, bass; Hans Hulbækmo, trommer. Odin

Flukten vekte oppsikt då dei kom med debutplata Velkommen håp i september 2021 – friskt, fengande og velutvikla samspel ti låtar igjennom. Oppfølgjaren har mange av dei same kvalitetane, men det er ei klar utvikling å spora både i låtmaterialet, arrangementa og samspelet. Utviklinga er både føreseieleg og gledeleg overraskande.

Med Flukten viser dei fire ein sjølvtryggleik som dei brukar til å testa ut meir komplekse komposisjonar og utfordrande arrangement. Sjølvtryggleiken gjev dei ekstra vågemot i samspelet. Spesielt spanande er det å registrera utviklinga i samspelet mellom Paulsberg og Klovning.

Seks av dei åtte låtane er komponerte av Hulbækmo. Dei to andre er signert Klovning. Hulbækmo demonstrerer tidt og ofte kva eineståande trommeslagar han er, men her syner han i tillegg komposisjonsgjevnader det er verdt å merka seg. Bidraga frå Klovning passar fint inn i miksen.

Det beste med Flukten er det at fem låtar er spelte inn i studio, medan dei tre siste kutta er konsertopptak frå Svolvær og Trondheim. Ei samanliknande lytting på opningssporet «Flukten» og første livekutt «Monica fra Svolvær» syner kor medvite dei brukar dei ulike framføringssituasjonane. Studioopptaket er prega av djup og intens konsentrasjon, medan livekuttet formidlar ei tilbakelent og gladlynt formidling. Her har Ole Brum fått viljen sin – ja takk, båe delar! Flukten har teke eit steg vidare.

Lars Mossefinn

Lars Mossefinn er frilans journalist og fast jazzmeldar i Dag og Tid.