Phelimuncasi

Ama Gogela:

Nyege Nyege Tapes

Elektronisk musikk

Det kenyanske labelet Nyege Nyege Tapes kjem med den eine utgjevinga etter den andre med framifrå, særeigen musikk frå breidda og lengda til det afrikanske kontinentet. Albumet Ama Gogela, signert trioen Phelimuncasi, er kalla opp etter ei svær bie, og er proppfull av susande, brummande beats som stryk mjukt og taktfast over trommehinnene med skarp brodd som pirkar rundt djupt inni sjelslivet.

Bandet er del av Durbans gqom-scene, kjent for ei særeigen form for elektronisk dansemusikk kjenneteikna av buldrande, langstrekte maskinbasstrommdrønn som rullar av garde i djupet av sub-bass-registeret og polyrytmiske perkusjonsmønster der house, afrobeat og tradisjonsmusikk er vovne saman til lydbilete med underleg futuristisk preg.

På Ama Gogela har trioen alliert seg med gqom-produsentar som DJ MP3 og DJ Scotum samt Net Gala frå Sør-Korea. Albumet er inspirert av sørafrikansk scenekunst- og forteljartradisjon. Her blir grensa mellom den velkjente, underleg organiske klangen av den klassiske 808-trommesynthen, afrikanske akustiske perkusjonsinstrument og beatboxing-liknande rytmiske stønn, hyl, tungeklikk og forvridde strupehovudstøytar viska ut. Det er som den frilynte leiken med vokalar, konsonantar, forvridde strupehovud, gutturale lydar, song og rap transcenderer språkbarrierar og uttalar ei useieleg meining.

Musikken får ein – underteikna skribent, til dømes – til å gjere seg nokre tankar om kva kommunikasjon kan hende i grunn er. Medan føtene trampar laust og taktfast av garde utan mål, men med meining, då.

Rasmus Hungnes

Rasmus Hungnes er kunstnar, musikar og fast musikkmeldar i Dag og Tid.