CD

Ymse komponistar:

Colours of Christmas

Bragernes kirkes ungdomskor;
dir.: Beate Strømme Fevang. LAWO 2021

Vide fraseringar og varm klang karakteriserer juleplata til Bragernes kirkes ungdomskor, Colours of Christmas, der korjentene framfører 15 julesongar akkompagnert av eit knippe instrumentalistar. Mellom desse er Anders Eidsten Dahl på orgel og klaver. Den rytmiske snerten han saman med trompetisten i stykket «Rejoice» får til på det store orgelet i Bragernes kyrkje i Drammen, der han er kantor, er herleg. Organisten gir stykket driv, for orgelet fungerer nesten som paukane i trompetfanfarar.

Dette skifterike stykket er skrive av Fredrik Sixten (fødd 1962). Han er svensk, men var tidlegare domkantor i Nidarosdomen. Ser me nærare etter, er faktisk over halvparten av repertoaret norsk eller er skrive av komponistar knytte til Noreg.

A capella-musikk (for kor åleine) finst òg, mellom anna dei kjende «Ding Dong! Merrily on High!» og «Carol of the Bells». Den sistnemnde blir framført med klår klangleg differensiering mellom stemmene, der songarane har eksplosive ansatsar som imiterer lyden av klokkeklang. Dirigenten Beate Strømme Fevang er god til å disponera dynamikken, med presist velforma crescendoar sjølv i dei kortaste frasane. At korjentene har litt austlandsk aksent på engelsken, er berre sjarmerande.

Sjur Haga Bringeland