Jazz

Eberson:

Between Two Worlds

John Eberson, gitar; Marte Eberson, tangentinstrument; Jo Berger Myhre, bass; Rune Arnesen, perkusjon; Axel Skalstad, trommer.
Jazzland Recordings

Far og dotter Eberson er ute med ny plate som skil seg klart frå samarbeidsdebuten Empathy som kom i 2018. Between Two Worlds er ein illustrerande tittel. Musikken her har likeverdige bidrag frå båe generasjonar. På debuten var det åtte songar der arrangementa sjølvsagt relaterte til tekstane. Marte var vokalist, og musikken reflekterte først og fremst hennar musikalske univers. Det nye albumet er ei instrumentalplate der improvisasjonen har ein langt meir sentral plass.

På Between Two Worlds blir temaa formidla av gitar og/eller tangentinstrument i eit stadig skiftande lydlandskap, og dei improviserte partia glir ofte elegant over i arrangerte parti og attende. Jons karakteristiske gitartone får skina titt og ofte, og Marte byr på ei sareptakrukke av elektronisk vellyd. Det fungerer strålande plata igjennom, men på «The Butterfly’s Dream» greier dei ikkje å skapa den naudsynte spenninga.

Musikken er mangfaldig og spenner frå den groovy «Strange Highway», via balladen «Reverie» til høgdepunkta «Dream Walking», med ein utruleg spanande intro av Marte, og «Dancing with The Big Fish», der dei til dei grader spelar kvarandre gode. Rytmeseksjonen gjer ein framifrå jobb, og det må vera lov å dra fram det suggererande basspelet til Jo Berger Myhre. Kjøper du CD-en, får du i tillegg bonuslåten «A Silent Message».

Lars Mossefinn

Lars Mossefinn er frilansjournalist og fast jazzmeldar i Dag og Tid.