Jazz

Anders Lønne Grønseth Multiverse:

Outer View

Hayden Powell, trompet; Anders Lønne Grønseth, klarinett, tenor- og altsaks; Espen Berg, piano; Audun Ellingsen, bass; Einar Scheving, trommer.
NXN Recordings

Anders Lønne Grønseth gav i 2018 ut den første plata med Multiverse, og på oppfølgjaren Outer View er besetninga uendra. På debutplata stod Grønseth for komponeringa. No deler medlemene på jobben. Elles er det trekk ved denne plata som er ei utvikling av debuten. Ad lib-partia er romslege, men elegant integrerte i den musikalske heilskapen.

Grønseth har jobba mykje med det han kallar «bitonalt skalasystem», der han utforskar ulike tilnærmingar til modalitet, til dømes indisk musikk, maqamtradisjonen frå Midtausten og serialismen. På heimesida hans kan ein fordjupa seg i dette, men som han sjølv seier, er lyttarens eiga oppleving av musikken, uansett føresetnad, det som betyr noko. Oppleving av musikk er alt anna enn å identifisera teoretiske byggverk.

Multiverse har lukkast. Dei når lyttaren med raus og inviterande musisering. Både komposisjonane og arrangementa er komplekse, men framføringane er uanstrengde og fylte av leikne sekvensar, som til dømes pianotriosekvensen i Grønseths «Bifokal».

Det harmoniske landskapet er ope, og instrumentering, harmonikk og uttrykk fører innimellom tankane i retning Kenny Wheeler, men han er jo inspirasjonskjelde for ei mengd jazzmusikarar no om dagen. Dette er fem musikarar som på alle vis står godt til kvarandre. Det er ei plate heilt utan skjemmande kvileskjer.

Lars Mossefinn

Lars Mossefinn er frilans journalist og fast jazzmeldar i Dag og Tid.