Jazz

Arild Andersen Group:

Affirmation

Marius Neset, tenorsaksofon; Helge Lien, piano; Arild Andersen, bass; Håkon Mjåset Johansen, trommer. ECM

For knapt eit år sidan var Arild Andersen Group i Rainbowstudioet for å spela inn låtar av bandleiaren, truleg konsertrepertoaret som dei turnerte med seinhaustes 2019. I november 2021 var det framleis pandemi og reiserestriksjonar, så Mannfred Eicher kom seg ikkje til Oslo. Når katten er vekke, dansar musene på bordet...

På andre dagen av innspelinga føreslo Andersen at dei skulle improvisera fritt og sjå kva som kom ut av det. Resultatet finn ein på denne plata, uredigert. Det første strekket er 23 minutt langt og det andre 14. Sjølv om dette er improvisert fram i to økter, har musikken ei form som naturleg lèt seg dela inn i sju med titlar frå «One» til «Seven».

Andersen sjølv har mang ein gong gått til ein spelejobb med blanke ark, men for denne kvartetten var det ei ny utfordring. Det er utruleg spanande å følgja dei på ferda frå dei første famlande stega. «One» fungerer som eit anslag der Neset introduserer pulsen som blir eit berande element i «Two». Dette stykket vert avslutta rubato. Denne avslutninga pregar balladen som Neset innleier og Lien følgjer opp. Slik finn ein tilknytingspunkt og sporvekslarar gjennom alle sju delane.

Det mest overraskande er kor strukturert det heile er. Dette er så langt frå eit kollektivt primalskrik som det er råd å koma. Visst er det temperatur i musiseringa, som til dømes i høgdepunktet «Four», men ein vesentleg del av lytteopplevinga ligg i å høyra korleis dei tek tak i ideane til kvarandre og transformerer og modifiserer dei på logisk og elegant vis. Musikken vert sett i relieff ved at plata sluttar med den melodiske Andersen-komposisjonen «Short Story». Me skal vera glade for at Eicher aldri kom seg med flyet frå München til Oslo den dagen i november 2021.

Lars Mossefinn

Lars Mossefinn er frilans journalist og fast jazzmeldar i Dag og Tid.