Samtidsmusikk

Propan:

Swagger

Ina Sagstuen og Natali Abrahamsen Garner, vokal og elektronikk; Torstein Lavik Larsen, trompet; Anja Lauvdal, synthar; Fredrik Rasten, ak. gitar; Anton Toorell, elgitar; Magnus S. Nergaard, bass; Jan Martin Gismervik, trommer.
Sofa

Sagstuen og Garner etablerte i 2011 duoen Propan. Femme Brutal, eit feministisk klubb- og bookingkollektiv heimehøyrande i Oslo, tinga verket Swagger til festivalen deira 26. august i 2016. Seinare har dei vore i Studio Paradiso og spelt inn verket. Finpussen har duoen gjort i fleire rundar saman med Lasse Marhaug.

Verket er sett saman av elleve korte delar, «AI» til «AV» og «BI» til «BVI». Den store variasjonen i uttrykk og karakter til dei ulike delane gjer det i førstninga vanskeleg å få fatt i den indre samanhengen i dei elleve delane, men etter nokre gjennomhøyringar vert ein del sambandslinjer og overordna kompositoriske grep tydelege.

Sagstuen og Garner er inspirerte av minimalisme og konkret musikk. Triangelet duoen dannar med Lauvdal, er det som sterkast pregar musikken. Korte melodiske fragment i vokalen saman med det karakteristiske synthspelet til Lauvdal gjev uttrykket eit naivistisk preg.

Verkemiddelet som pregar musikken sterkast, er likevel gjentakinga – i minimalistisk forstand. Høgdepunktet på plata er «AV». Her har alle i ensemblet ein meir likeverdig funksjon. Musikalske idear kjem og går, men alle innordna den suggererande og småskakke grooven. Swagger er ei forfriskande lytteoppleving.

Lars Mossefinn

Lars Mossefinn er frilans journalist og fast jazzmeldar i Dag og Tid.