Jazz

Olga Konkova Trio:

Open Secret

Olga Konkova, piano og Fender Rhodes; Per Mathisen, bass; Gary Husband, trommer.
Losen Records

Olga Konkova er attende på Losen Records med den faste trioen sin og eit dusin nye låtar etter liveinnspeling på tyske Dreyer Gaido i fjor. Trioen var hjå Vidar Lunden på Musikkloftet i Asker dagen etter at Noreg koronastengde.

Låtmaterialet sveiper innom ulike sjangrar, tempi og uttrykk, men Konkova har eit spesielt varmt hjarte for det mollstemte. Ho nyttar pausar effektivt i «Discovering The Truth», og det gjev låten eit sterkt meditativt preg.

Pianostilen hennar er ein kombinasjon av kraft og ynde. Det er ein sjølvtrygg klarleik i spelet, og ho blir ofte dregen mot den lægre delen av registeret, noko som stundom gjev uttrykket eit dystert preg.

Elpianoet nyttar ho i hovudsak til å fargeleggja. Det er gjort på elegant vis i den raske «Grande Capitano». Her viser også Konkova temperament i pianokoret, noko ho kunne ha varta opp med oftare på plata. Dialogen med Husband på slutten av låten er også eit høgdepunkt på plata.

Husband kompar i all hovudsak, medan Mathisen har fleire solistiske markeringar. Han har ein vakker tone i den akustiske bassen. Lydbiletet er klårt, men til tider ganske sterkt. Opptaka med mikrofonplassering, bruk av klang, miksing og mastring gjev i sum ei lytteoppleving som skapar ei kjensle av å sitja midt inne i trioen. Eg opplever det som kunstig og til tider enerverande – utan at dette øydelegg for eit positivt heilskapsinntrykk.

Lars Mossefinn

Lars Mossefinn er frilans journalist og fast jazzmeldar i Dag og Tid.