Rock

LCD Soundsystem:

American Dream

DFA/Columbia

LCD Soundsystem debuterte i 2002 med singelen «Losing My Edge», ein song unnfanga av skrekkslagen sjølvinnsikt. I videoen til dette smerteleg sjølvironiske førsteverket om å lene seg på den gode smaken sin framfor å lage noko sjølv, ser vi eit nærbilete av frontfigur John Murphy, som proklamerer creden sin medan han får øyrefik etter øyrefik. I 2011, etter eit lite tiår i rampeljoset, braut LCD Soundsystem opp, men no er det amerikanske bandet tilbake, meir aktuelt og heilstøypt enn nokon gong.

Aukande intensitet

I videoen til «Tonite» får vi sjå ein Murphy med meir livserfaring – og som har blitt ein imponerande vokalist – som ein slags ambivalent farsfigur som i assosiativ stil deler livsvisdom med overføringsverdi til det meste frå pop og privatliv til storpolitikk og overvaking, medan han sirklar rundt bandet sitt. Musikken, både på dette sporet og plata elles, er minimalistisk, men likevel massiv, drive fram av konsise, enkle, repeterande bassliner, ofte monoton og/eller atonal rytmegitar og transeinduserande tromme-, perkusjons- og trommemaskinarrangement. Intensiteten aukar nærast umerkeleg i kvart einaste spor.

80-talsinspirasjon

LCD Soundsystems blanding av klubbmusikk og postpunk blir ofte kategorisert som dancepunk. På American Dream er 80-talsinspirasjonen openberr, med flust av referansar til mellom anna David Bowie og Talking Heads, i tillegg til det 50–60-talsaktige syntetiserte doo-wop-tittelsporet. Det heile er utført med stor finesse – og dertil er det dansbart.

Rasmus Hungnes

Rasmus Hungnes er musikar og fast platemeldar i Dag og Tid.