Folkemusikk

Arne M. Sølvberg:

Gode minne

Lærdal musikkproduksjon

Felespelaren og folkedansaren Arne M. Sølvberg (f. 1950) frå Fjelli i Nordfjord har i ei årrekkje vore ein ihuga formidlar av slåttespel og – ikkje minst – kunnskap om folkemusikken og folkedansen. Han har mellom anna vore leiar av spelemannslaget Fjelljom, undervist ved Ole Bull Akademiet, vore fylkesmusikar i Sogn og Fjordane og gjeve ut fleire plater.

Denne plata har eit særskilt tema: Alle slåttane, både runddansmusikk, eldre og nylaga slåttar, vert spela på hardingfeler som er bygde av Anders Heldahl (1811–1897) frå Bergen. Felene hans var bygde i den gamle stilen, det vil seie mindre enn den fiolinpåverka moderne fela, og Sølvberg har rigga instrumenta med tarmstrengar og nyttar jamvel den gamle, korte bogetypen.

Mange av felene til Heldahl har lenge vore rekna som «umoderne» og ikkje vore i bruk. Ved å lyfta dei fram att på dette viset har Sølvberg gjort eit pionerarbeid. Men mykje av musikken har vore lite i bruk, og i alle fall ikkje vore utgjeven på plate før.

Produksjonen er ikkje berre ei CD-plate, men inneheld òg eit svært informativt teksthefte og mange fotografi. Mykje av dette er av særleg interesse for folkemusikkekspertane, men historikk og anekdotar er kledde i eit lettflytande språk som gjer det faglege stoffet tilgjengeleg for eit meir ålment publikum.

På mange måtar er dette ei plate for Sølvbergs fagfellar – slike som er særskilt interesserte i hardingfeler, utøvarar, tradisjonsliner og repertoar. Men samstundes er det ei plate for alle som likar hardingfelespel og danseslåttar.

Sigbjørn Apeland

Sigbjørn Apeland er musikar, musikkvitar og fast musikk­meldar i Dag og Tid.