Folkemusikk

Jens Nyplass:

Leken min

Ta:lik

Felespelaren Jens Nyplass frå Røros har i 25 år vore kjend som leiar av Glåmos spellemannslag, men dette er hans første plate i eige namn. For det meste spelar han solo, men på nokre spor får han selskap av kona Siw-Marit J. Nyplass, som deltek i den særmerkte samspelsforma «grant og grovt» – det vil seia at melodien vert framført unisont, men i oktavavstand (tilsvarande når ei kvinne- og mannsstemme syng ei melodistemme saman). Og dessutan får me høyra trioen til Nyplass, med Jan Frostvoll (fele) og Bent Jacobsen (trøorgel).

Det meste av musikken er framført i tradisjonell stil – både polsane, runddansmusikken og Nyplass’ eigne komposisjonar, der «Tristaste valsen» er eit høgdepunkt. Likevel kjennest ikkje dette attendeskodande eller musealt. Tvert imot er spelet prega av ro og tryggleik, slik det ofte er når spelemannen har arbeidd grundig med stoffet. Nyplass og kameratane hans har heilt sidan ungdomsåra oppsøkt førebileta Peder og Olav Nyhus på Glåmos for å tileigna seg spelekunna.

Røros har hatt eit aktivt folkemusikkmiljø gjennom fleire generasjonar, og mellom andre Sven Nyhus (frå den eldre generasjonen) og yngre arvtakarar som Olav Mjelva og John Ole Morken, som har vore produsent på denne CD-en, har dessutan spelt inn mykje av denne musikken på plate. Nettopp difor har Nyplass valt ut Røros-musikk som er mindre kjend. Men om musikken er ukjend, er han ikkje dårleg. Tvert om: Dette er ein solid produksjon, der gamle og nye leikar utgjer ein fin heilskap.

Sigbjørn Apeland

Sigbjørn Apeland er musikar, musikkvitar og fast folkemusikkmeldar i Dag og Tid.