Jazz

Solveig Slettahjell
Quartet:

Gullokk

Solveig Slettahjell, vokal, Andreas Ulvo, piano, Trygve Waldemar Fiske, bass og Pål Hausken, trommer.
Jazzland Recordings

Solveig har gjennom fleire år samla seg eit knippe songar som skulle bli hennar nordiske songbok. Med dei ti låtane på Gullokk har ho laga det svensk-norske kapittelet, så vil tida visa om låtar frå resten av Norden får sine Slettahjell-tolkingar. Om dette som her er servert, er standarden, er det grunn til å venta spent på framhaldet.

Slettahjell kjenner ein att uansett kva repertoar ho tek fatt på. Denne plata er ikkje noko unnatak. Samstundes er det slik at ho har valt låtar der det alt er spelt inn slitesterke tolkingar. Det gjeld til dømes Mats Paulsons «Vind över vindens ängar», Allan Edwalls «Vaggvisa» og «Besøk» av Bjørneboe og Preus.

Likevel finn Slettahjell sin sjølvsagte plass. «Trassvisa hennes Tora» og, i særleg grad, «Ved Rondane» er sterke tolkingar sjølv til Slettahjell å vera. Førstnemnde skil seg frå tolkingar som ein finn dusinet av. Her er ikkje eit snev av svulstig inderleg, og mellom tredje og fjerde strofa serverer Ulvo eit makelaust kor. Det heiter at ein ikkje joikar om ein person, men joikar personen. Her spelar Ulvo Tora.

«Ved Rondane» represen­-
terer eit nasjonalromantisk høgdepunkt. Kor mange tolkingar som er innspelte, har eg ikkje tal på, men kvartetten har nærma seg tekst og musikk på unikt vis – som eit tapt paradis, ikkje som ei overveldande naturoppleving der og då. Dei ligg resignert bakpå, og Ulvo skapar på minimalistisk vis spenning ved å tvihalda på enkelte figurar.

Det har blitt ufortent lite Fiske og Hausken, men dette er eit kollektivt løft, og dei er diskrete, men perfekt til stades. Svært vellukka, om nokon framleis er i tvil.

Lars Mossefinn

Lars Mossefinn er frilans journalist og fast jazzmeldar i Dag og Tid.