Jazz / Americana

The Red Barn:

The Red Barn

Aksel Røed, saksofonar; Mathias Marstrander, gitar, pedal steel og perkusjon; Arne Toivo Fjose, bass, cello og perkusjon; Kåre Opheim, trommer og perkusjon.
Musicwelike Records

Kva er det med countrymusikken som fascinerer og inspirerer så mange jazzmusikarar? I møte med kvartetten The Red Barn er det grunn til å stilla spørsmålet. Den bergensbaserte kvartetten med vossingen Kåre Opheim som seniormedlem er av heller ny dato. Musikken er spelt inn for vel eit år sidan, og Fjose og Marstrander har komponert fire låtar kvar, medan Røeds «So Close, So Come» avrundar side A. (Eg har lytta på vinyl, som de forstår.)

Sjangernemninga americana blir brukt om eit vidt spekter av musikalske uttrykk med utgangspunkt i amerikansk populærmusikalsk tradisjon. The Red Barn spelar ein variant av instrumental americana, og dei gjer det med overtyding. Ikkje på noko tidspunkt verkar sjangerrammene hemmande. Sjølv i den tradisjonelle «Blue Stream» tippar det ikkje over i ufrivillig sentimentalitet. Dei gjev seg medan leiken er god.

Gitaren og pedal steel-en til Marstrander pregar lydbiletet sterkt. Temaa blir ofte presenterte og utvikla på mest delikate vis av Røed og Marstrander i lag. Fjose og Opheim held i gang eit enkelt og effektivt komp som aldri overlesser eller går i vegen, men dei er der på botnsolid vis. Det er avgrensa rom for improvisasjon i musikken, men både Marstrander og Røed har nokre få korte innspel som løfter musikken, spesielt det dei gjer på Fjoses «Mr. Goomba», peikar mot ein opnare konsertversjon av bandet. Musikken er leiken og sjarmerande, men samstundes dønn ærleg.

Lars Mossefinn

Lars Mossefinn er frilans journalist og fast jazzmeldar i Dag og Tid.