Pop/elektronisk

Yaeji:

With a Hammer

XL

Yaejis debutsingel «New York ’93» kom ut i 2017, og With a Hammer er det første albumet hennar. Her konfronterer New York-artisten ein del av kjensleapparatet som vert kalla «sinne», men ikkje berre sinne: Blanda kjensler er no det vi oftast kjenner på.

Yaeji syng på ei blanding av koreansk og engelsk, og musikken inneheld element av triphop, elektronisk dansemusikk, hardtslåande rock, hardtslåande, breakcore-aktige opphakka trommerytmar, mjuke, til dels lystige melodiar, new age-fløyter, 00-tals chillout-elektronika, R&B med meir.

Syntharrangementet i opningssporet «Submerge FM» minner på underleg vis om Tsjajkovskijs Nøtteknekkaren; på avslutningslåten får Yaeji sikkeleg tilslag på den eksperimentelle balladen «Be Alone In This», spekka med fuktige vokaleffektar og klangen av melodisk slagverk.

Sinne blir i stor grad sett på som uakseptabelt i det moderne samfunnet: ei stygg og ekkel kjensle som strir mot positivitet og står i motsetnad til glede, ein del av den emosjonelle paletten som bør gøymast i mørkeret under lokket til det emosjonelle målarskrinet.

På omslaget til With a Hammer poserer Yaeji lik ein samurai med sleggje, eit verktøy som kan brukast til ymse slag slag og bank, og undertrykt sinne kan som kjent slå tilbake med renter.

Yaeji klemmer sinnet ut frå tuben og målar djupe studiar av det emosjonelle havet. Utslaget er ein mangefasettert, dynamisk og skiftande studie av sinnelagslandskapet, eit sonisk panorama der klare, glidande gradientar dominerer over skarpe, ambivalente kontrastar. With a Hammer er ei slagkraftig plate, og når musikken bankar på mine trommehinner, slår det meg at Yaeji har treft spikaren på hovudet.

Rasmus Hungnes

Rasmus Hungnes er kunstnar, musikar og fast musikkmeldar i Dag og Tid.