Jazz

Sondre Ferstad:

Snirkelsongar

Sondre Ferstad, munnspel og vokal; Heidi Skjerve, vokal; Morten Stai, bass; Vegard Lien Bjerkan, trøorgel og perkusjon.
Øra fonogram

Sunnmøringen Sondre Ferstad er ein sjeldan plante i den norske jazzfloraen. Munnspel høyrer ein knapt, og sjølv om trøorgel har fått sin renessanse, er det ikkje mange som gjer det til sjølve hovudinstrumentet på ei utgjeving. Ferstad er inspirert av Christian Wallumrød, som han meiner er ein meister i «retningsskifte» i musikken.

Melodiane skal ta overraskande vendingar. «Litt som dei er i ein labyrint», skriv Ferstad i presseskrivet. «Ventesong» har ein metatekst til prosjektet skriven av Heidi Skjerve, med ein aldeles nydeleg intro på bass og munnspel: «Så det vi alle ventar på/ er å finne ein forunderleg vakker melodi/ som snirklar seg gjennom ein uventa harmoni». Skjerve har skrive to tekstar til, medan to er førte i pennen av Maren Barlien.

Ferstad er også inspirert av den norsk salmetradisjonen. Ein kan gjerne sjå på ambisjonen om overraskande melodiske vendingar kopla med ei forankring i salmetradisjonen som ein formidabel motsetnad, men Ferstad lever godt i dette «konfliktområdet». Det blir musisert jordnært og upretensiøst, og ensemblet gjev lydaren godt rom til å dvela ved melodiske vendingar og harmoniske løysingar. Ferstad har valt seg eit hand-i-hanske-instrumentarium, og den ordlause fraseringa til Skjerve er gjennomført med dynamisk perfeksjon.

Lars Mossefinn

Lars Mossefinn er frilans journalist og fast jazzmeldar i Dag og Tid.