Jazz

Harald Lassen:

Opplevelser fra N (impro & låt)

Harald Lassen, saksofon, piano og synth; Bárdur Reinert Poulsen, bass; Veslemøy Narvesen, trommer, perkusjon og melodika.
Jazzland recordings

Plata er sett saman av åtte improvisasjonar og ein komponert låt. Alt saman i eit kort format der den lengste improvisasjonen er på fire og eit halvt minutt og den kortaste på om lag eitt. Nettopp kombinasjonen av fri improvisasjon og lengd på dei ulike stykka gjev utgjevinga særpreg, men reiser også ein del grunnleggjande spørsmål.

At N er ei forkorting for Noreg, er noko eg berre reknar med, og det har strengt teke ikkje noko å seia for korleis ein vurderer musikken. Det har heller ikkje det faktumet at Lassen for nokre år sidan hadde eit skilsetjande møte med filosofien til Arne Næss, sjølv om dette vert sterkt vektlagt i presseskrivet.

Musikken talar for seg. Dei åtte improvisasjonane har ulik karakter. Det spenner frå det vakre ballade-embryoet «Gutts fred i solituden» via eit strykebasskor som Lassen auser over med harpeliknande arpeggioar i «Ubeskrivelig syn», til det meditative «temaet» «Dyp reunion» spelt på saksofon med Poulsen i ei fri rolle før det strammar seg til rytmisk. Sjølv om det her er tale om improvisasjonar, har dei fleste stykka ei heilskapleg form som minner om komponerte låtar.

Det er ein god strategi å gå av scenen medan publikum ynskjer seg meir, eller gje seg medan leiken er god, men å gje seg før leiken i det heile har byrja, er ikkje tilrådeleg. I møte med Opplevelser fra N sit eg att med eit inntrykk av noko ufullenda, augneblinkane som ikkje blei tekne vare på. Trioen demonstrerer kva dette kunne ha vorte på nemnde «Dyp reunion» og i særleg grad på den einaste komponerte låten, «Con Arne». Sistnemnde er ei perle.

Lars Mossefinn

Lars Mossefinn er frilans journalist og fast jazzmeldar i Dag og Tid.