Americana

Trond Kallevåg:

Amerika­båten

Trond Kallevåg, gitar/pedal steel; Daniela Reynes, trekkspel/gitar; Selma French, feler/gitar; Håkon Aase, fiolin, gitar/trøorgel; Jo Berger Myhre, bass; Ola Øverby, trommer og sag. Hubro

På dei to første platene gitarist Trond Kallevåg gav ut, Bedehus & Hawaii og Fengselsfugl, hadde han heilt spesifikke tema som utgangspunkt. Slik er det også denne gongen. Amerikabåten tener som bilete på musikalske impulsar som har reist fram og tilbake over Atlanterhavet, samstundes som han representerer sterke forteljingar om menneske som opplevde dramatiske omskifte i livet sitt. Både draumar, sakn og brutal realisme er ein del av alle migrasjonshistorier. Slike stemningar kan òg merkast i musikken: frå naiv optimisme til sår melankoli.

Men sjølv om Kallevåg har tydelege tema som utgangspunkt for kvart plateprosjekt, har han heile tida eit attkjenneleg særpreg. Og det klingande resultatet er ikkje veldig ulikt frå plate til plate. Dette viser at spesifikke tematiseringar (innan instrumentalmusikk) først og fremst er noko som tener som inspirasjon og gjev retning for komponisten.

Dette er musikk som er vanskeleg å sjangerfesta: Fleire av musikarane har bakgrunn frå jazz, folkemusikalske element er til stades gjennom bruk av trekkspel, fele og sag. Pedal steel-gitaren gjev assosiasjonar til country & western, og elles er det mange element som ein kjenner frå akustiskbasert pop og rock, ofte under merkelappen «americana».

Amerika­båten er òg fri for provoserande eller støyande element. Musikken kling mildt og melodiøst og er truleg lett å lika for dei fleste. Dei ni spora er stramt komponerte, improvisasjonane er disiplinerte, og sjølv om plata er spekka med små melodiar og akkordvendingar ein kan ha høyrt før, framstår dette som originalt heile tida. Dei fleste elementa er velkjende, men heilskapen er særprega. Det er berre å gle seg til Kallevågs neste temareise.

Sigbjørn Apeland

Sigbjørn Apeland er musikar, musikkvitar og fast musikk­meldar i Dag og Tid.