Turen er naturlegvis komen til kling. Kling er ein norsk matskatt, som verkeleg vert sett stor pris på. Og medan Innsida ventar på statleg overføring for dette tiltaket, som no altså har kome i si tredje utgåve, slår me til med kling (eller kliner til, som ungdommen ville ha sagt det).

Kling er rett og slett ei mjuk, god kveitemjølslefse med søtt fyll mellom to lag. Det kan vera smør og sukker, men til bryllaup eller festlege lag lyt ein bruka prim og sirup.

Nydeleg til kaffien, men òg ei kjærkomen, lita overrasking frå sekken når du set deg til øvst på ein fjelltopp.

Verksemda Nøring i Øystese, som vert driven av dei tre damene Helga, Marit og Sigrun, lagar ein veldig flott Hardangerkling, som ein får her og der i gardsbutikkar med godt utval.

Dei legg stor vekt på den sosiale i klingen.

«Når du ser naboen kome nede i vegen, så set du på kaffien og tek lefsa opp frå frysen. Då er begge deler klare til gjesten kjem», heiter det frå klingentusiastane hjå Nøring.