Ny bok frå Pussy Riot-stjerne

Ein av medlemene av Pussy Riot, Nadja Tolokonnikova, gjev ut boka Read & Riot 9. oktober, melder Pitchfork. Slik presenterer forlaget boka: ein «geriljaguide for radikale protestar og lystfull politisk motstand». Den russiske aktivisten har vorte arrestert mange gonger etter ymse demonstrasjonar i Russland.

Storegutprisen

Storegutprisen har namnet sitt etter diktsamlinga Storegut av Aasmund O. Vinje. Prisen blir delt ut på Storegut-arrangementet 25. august, under Litteraturdagane i Vinje. Det er Storegutnemnda, samansett av Stein Versto, Ragnvald Christenson og Guro Ljone, som har plukka ut Storeguten for 2018. Og kven er Storegut i år? Jau, det er visseleg ein stor gut, det er Olav Vesaas. Han får prisen for sin store innsats for norsk språk og litteratur i skrift og tale. Vesaas er frå same stad som Vinjes storegut, den legendariske Olav Olavsson Edland. Denne namnebroren med vinnaren var nemleg frå Edland i Vinje.

Diktarstien i Botnane

Den fyrste diktarstien i Sogn og Fjordane opnar komande laurdag, i Botnane i Bremanger, med dikt av Jan-Magnus Bruheim som budde i bygda frå 1978 til 1985. Stien blir offisielt opna av brordottera til Bruheim, forfattar og journalist Magnhild Bruheim. Det Norske Samlaget og venelaget lanserer ny bok med eit utval av barnedikta til Jan-Magnus, på opninga laurdag.

ronny@dagogtid.no