Ny sjef for Biblioteksentralen

Hans A. Vigen er tilsett som ny administrerande direktør i Biblioteksentralen. Biblioteksentralen har rekruttert internt. Hans Vigen er 52 år, busett i Lier og kjem frå stillinga som økonomi- og driftsdirektør i Biblioteksentralen. Elles har han bakgrunn frå ulike leiarstillingar i bilbransjen, IT-bransjen, musikkbransjen og NRK.

Dyrt domene

Bedrifter som driv med netthandel, gjer det som kjent stort for tida, og innan bokhandel er det amerikanske Amazon som er den store aktøren. Ja, dei driv så stort at dei er viljuge til å betale i dyre dommar for eit internettdomene. Amazon vil utvide i Sverige og etablere «amazon.se» på nettet, men ei stockholmskvinne hadde alt oppretta eit domene med den tittelen. Amazon bladde opp pengar for å skaffe seg nettsida. Svenske medium har lenge spekulert på kor mykje det er tale om. No meiner den svenske nettstaden Ehandel.se å ha svaret: Kvinna skal ha fått over seks millionar for domenet.

etterlyser kvinner i gatenamn i Bergen

«Me bør slutta å kalla opp gater etter menn.» Det seier Oddny Miljeteig til NRK Hordaland. SV-politikaren er lei av alle gatenamn i Bergen med mannsnamn. No vil ho ha fleire gatenamn kalla opp etter kjende kvinner. Ho har fått bystyret i Bergen med på det. Men det finst alt ei rekkje gater og vegar med kvinnenamn, ei av dei er Camilla Colletts gate. Dei er likevel i fåtal jamført med gatene kalla opp etter karar.

ronny@dagogtid.no