Pris til Maria Parr

Maria Parr får Nynorsk barnelitteraturpris 2017 frå Noregs Mållag for boka Keeperen og havet, gjeven ut på Samlaget. Prisen på 30.000 kroner er delt ut sidan 1968.

«Med sine truverdige karakterar leverer årets prisvinnar eit solid stykke litteratur som kan stå seg i lang tid framover», skriv juryen i grunngjevinga. Maria Parr får prisen på Barnelitteraturfest på Samlaget i Oslo fredag 13. april, same dag som landsmøtet i Noregs Mållag opnar i Vinje. Dette er tredje gong Maria Parr gjev ut bok, og det er tredje gong ho får Nynorsk barnelitteraturpris. Juryen har vore Marthe Frette, Gudrun Kløve Juuhl og Kristine Thorkildsen.

Macbeth i haust

Det Norske Teatret har mange titlar, overraskande skodespelarnamn og nye regissørar på repertoaret i haust. Eit høgdepunkt er Shakespeares Macbeth, med Preben Hodneland i tittelrolla. Stykket får premiere fyrste september på scene 2. Blod og gørr strøymer gjennom Shakespeares mørke tragedie om maktkamp, svik og ei boblande svart heksegryte. Regien er ved Peer Perez Øian.

Ny Tolkien-bok

J.R.R. Tolkien-fansen hadde snautt venta at det skulle koma noko nytt frå forfattaren, som døydde i 1973, men der tok dei feil. Dei kan gle seg til sumaren, for då kjem ei ny forteljing frå Midgard, eit manus som har lege nedstøva i mange tiår. Tittelen på boka er The Fall of Gondolin, og soga handlar om ein fager, mystisk by som vart tynt av mørke makter i opphavstidene. Ifylgje The Guardian skal Ringdrotten-skalden ha kalla soga «den fyrste historia» om Midgard, og han skal ha skrive forteljinga rett etter deltakinga i slaget ved Somme under den fyrste verdskrigen. Boka kjem ut på engelsk i august. Tolkiens son, Christopher Tolkien, er redaktør av boka, og ho er illustrert av Alan Lee – som òg stod bak illustrasjonane i Hobbiten og Ringdrotten-trilogien.

Best i verda

Library of the Year er kåra. Vinnaren er Latvias nasjonalbibliotek. Prisen vart delt ut på The London Book Fair International Excellence Awards 2018 sist helg. Fire finalistar tevla om utmerkinga. Ein av dei var Noreg med Biblo Tøyen. Dei andre nominerte var Dokk1 (Danmark) og Biblioteca São Paulo (Brasil).

ronny@dagogtid.no