Sæterbakkens minnepris til Vatne

Stig Sæterbakkens minnepris vart utdelt for sjuande gong på haustfesten til Cappelen Damm tysdag kveld. I år var det forfattaren Bjørn Vatne, som debuterte i 2015 med romanen Slik skal vi velge våre ofre, som fekk prisen. I år er han aktuell med Nullingen av Paul Abel (Gyldendal).

«Romanen tilhører to verdener, den som omgir oss og den vi forestiller oss. Prisvinner Bjørn Vatne skriver fra begge disse romanverdenene, og plasseres derfor i et lite, celebert selskap her i Norge. Det er et slektskap til Sæterbakkens egne bøker, som ofte beveget seg i et grenseområde», sa juryformann Olav Haagensen.

Saabye-stipendet

På Cappelen Damms pressekonferanse for haustbøkene skjedde det òg noko anna: Lars Saabye Christensen delte ut årets Saabye-stipend til Kristin Buvik Sivertsen for debutromanen Omsorg. Saabye-stipendet vart oppretta i samband med Lars Saabye Christensens 60-årsdag i 2013, og det blir delt ut til ein av debutantane frå fjoråret.

Uro i bokbransjen

Etter kraftig nedgang i papirboksalet i fyrste halvdel av 2018 og ein like dårleg sumar, er det uro og otte mellom norske forleggjarar og bokhandlarar, melder VG. Ifylgje tal frå Forleggerforeningen gjekk salet av skjønnlitteratur fyrste halvår ned heile 13 prosent i høve til same periode i fjor, medan det totale boksalet gjekk ned 8 prosent. Det heldt fram i sumar. «Dette er det dårligste halvåret siden 2012», seier administrerande direktør Trine Stensen i Bokhandlerforeningen.

ronny@dagogtid.no