SKREKKFILM

Regi: Adam Robitel

Insidious: The Last Key

Med: Lin Shaye, Leigh Whannel

Elise (Shaye) frå dei tre førre Insidious-filmane må tilbake til barndomshuset som er gjesta av gjenferd. Nokon heim var det ikkje. Den fulle faren slo, og ein demon drap den godhjarta mora. Handlinga her skjer etter Insidious 3 og leier fram til den originale Insidious. Elise er ekspert og medium med mange skrømt å slå.

Shaye skin

Rutinerte Lin Shaye er kjent for skrekk og skratt frå Terror på Elm Street via Dum dummere til alle Insidious-filmane. Ho passar godt med mørke auge og uroa mine. Heldigvis har ho hovudrolla, ikkje platte Patrick Wilson som før. Manusforfattar Leigh Whannel spelar Specs, som med kameraten hjelper Elise. Nerdeparet står for eit lite vellukka komisk avbrot utan stort spel. Whannel har skrive ei hanglande handling med talrike vendingar. Tilbakeblikka til barndomen lir under dei karikerte foreldra.

Rutinevarsel

Brå lydar gjer at ein skvett medan skuggar og skrømt jagar jamt forbi og dukkar opp titt og ofte. Produksjonsverdien har auka sidan suksessen til den første filmen, så grafikken er betre, men serien er framleis ei middels mjølkeku med ambisjonar om stor avkasting. Suksessformelen er lågt budsjett for folk som vil ha same prosedyren som i fjor. Det får dei. Filmar som It Follows og Get Out har vist oss at skrekkfilm frå USA i dag kan vere meir. Det enkle er ikkje alltid det beste.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.