STOR kulturPRIS

Nils-Øivind Haagensen fekk denne veka Stiftelsen Kjell Holms kulturpris på 200.000 kroner. Prisen går til personar eller organisasjonar som er knytte til Ålesunds kulturliv.

Haagensen har publisert ei rekkje diktsamlingar, romanar og essay, og juryen viser til at Haagensen vert rekna blant dei fremste samtidslyrikarane i landet. Han har også fått Sultprisen, og i 2013 vart han innstilt til Nordisk råds litteraturpris for diktsamlinga God morgen og god natt.

KRITIKK AV IS-SERIE

Fjernsynssjåarar og kritikarar kritiserer den britiske fjernsynsserien The State for å glorifisera Den islamske staten. Søndag var det premiere på britiske Channel 4, berre få dagar etter terroren i Barcelona. Serien følgjer to britiske menn og to kvinner som reiser til Syria for å kriga for IS.

Den første delen vart sett av 1,4 millionar. No haglar det inn med skjellsord, melder Politiken. Ein av dei som klagar, meiner at serien er «som ein vervekampanje for nazipropaganda i 1930-åra». Channel 4 svarar på kritikken med å visa til at serien tek for seg eit viktig emne som bør utforskast.

HESTENESPRISEN TIL SIGURDSEN

Den prestisjefylte Arne Hestenes’ journalistpris for film, portrett og annan kulturjournlistikk vart delt ut på Den norske filmfestivalen i Haugesund. I år gjekk prisen til Silje Mariann Engja Sigurdsen, som er kunstkritikar i Bergens Tidende og Aftenposten og redaktør for videobloggen Kunzt. Sigurdsen er kunsthistorikar, og kjem frå Bergen.

– I ei tid der fleire fryktar at internettet er i ferd med å øydeleggja kulturjournalistikken, der det vert ropt om at alt var så mykje betre før, har Sigurdsen i staden omfamna dei sjansane nettet byr, for alt det er verdt som plattform for ei nyskapande, engasjerande og oppsiktsvekkjande form for kunstformidling, uttalar juryen.

ottar@dagogtid.no