Teater

Teatret Vårt

Neshornet

Av Eugéne Ionesco
Omsett av Lisa Thomas Olsen
Regi: Viktor Tjerneld
Scenografi og kostyme: Franziska Zahle

Det er ikkje ofte ein kan sjå to ulike tolkingar av ein teaterklassikar med eit par vekers mellomrom. Men no, like etter Det Norske Teatret, er Teatret Vårt på turné med nettopp Neshornet av Ionesco. Det kan vel hende det generelle nyheitsbiletet om dagen har gjeve stykket ein ny attraksjonsverdi for teaterfolk.

Som vi nyleg har registrert, er det ikkje utan vidare lett å gjere noko nyskapande av noko som alt har vore nyskapande, og Teatret Vårt slit sånn sett litt med det same problemet som Det Norske Teatret, men på litt andre vilkår. Denne gongen er heile originalteksta teken i bruk, sånn omtrent, men den skremmande kontrasten mellom røynd og mareritt forsvinn litt denne gongen òg. Scenebiletet er stilisert med pastellblå trappetrinn og ein glasvegg øvst. Det fungerer som ulike rom, ute som inne, men personane maiar seg stort sett ut som på karneval, og dei fleste mannsrollene vert spelte av kvinner med stygge polyesterparykkar. Den slags går det an å gjere som satirisk effekt, når det er leik med kjønnsroller. Men her ser det ut som ein ikkje har hatt nok mannlege skodespelarar å ta av.

Det overkarikerte og breipensla uttrykket verkar tiltenkt morosamt, men er lenge berre slitsamt. Og først i siste akta, når alvoret strammar seg, godtek vi situasjonane og rollefigurane som dei er. Og derifrå gjer òg skodespelarane inntrykk, sjølv om (nokre av) dei har fått feil kjønn.

Bent Kvalvik

Bent Kvalvik er filmarkivar og fast teatermeldar i Dag og Tid.