Det norske teatret

Scene 3:

Herostratos

eit scenisk partitur av Janne-Camilla Lyster
Regissør og komponist: Øyvind Osmo Eriksen
Dramaturg: Carl-Morten Amundsen

Stykket Herostratos skal handle om den menneskelege trongen til å bli sett som individ, og at denne trongen kan gå over i vondskap. Slik som legenda seier Herostratos gjorde det, da han sette fyr på Artemistemplet og gjorde ein udåd berre for å bli kjend. Det gjeld her òg drifta mot å bli monster, av redsle for ikkje sjølv å bli eten opp av monsteret. Problemstillingane er interessante, men det er vanskeleg å finne dei att i denne framsyninga.

Janne-Camilla Lyster er dansar, koreograf og forfattar. Det mest slåande med Herostratos er at det nett er danseteater dette fortonar seg som, og slett ikkje skodespel. Vi ser eit spenstig og fantasifullt kroppsspråk i ein svært metamorfosisk scenografi av plast og bølgjepapp. Her er absolutt augneblinkar av vill energi. Men vi sit jo og ventar på at noko konkret skal forteljast til oss. Når det da berre blir lausrivne replikkar mellom skodespelarar som ikkje kommuniserer med korkje oss eller kvarandre, er det ikkje lett å få noko vettug ut av det. Var det verkeleg dette som var meininga?

Bent Kvalvik

Bent Kvalvik er filmarkivar og fast teatermeldar i Dag og Tid.