Rogaland Teater

Barneteatret

Det tusende hjertet

av Tore Renberg og Janove Ottesen
Regi: Bjørn Ravn Carlsen
Scenografi: Even Børsum
Kostyme: Ingrid Nylander

Til Rogaland Teaters Barneteaters 50-årsjubileum for ti år sidan vart det levert ein splitter ny musikal for born, av forfattaren Tore Renberg og Kaizer-musikaren Janove Ottesen. Stykket, i slekt med både Roald Dahls og Astrid Lindgrens kryssklipte draum- og realismehistorier, vart ein stor suksess, og framsyninga den gongen ei flott fane for Barneteatret som institusjon. Ti år etter er stykket visuelt og musikalsk så likt originaloppsetjinga, at det alt fortonar seg som ein klassikar i selskap med Egner-stykka og «Julestjernen». Litt mørkare i grunntonen er det blitt, men framleis først og fremst spennande.

Forteljinga om to born som må ut i verda for å leite opp tapte hjarte, og kjempe mot fienden som har stole dei, har sjølvsagt klåre referansar til eventyr vi har høyrt og barnestykke vi har sett før, men uttrykket er likevel gjennomført originalt. Her er forstørra kroppsdelar som lever sine eigne liv, tidsmaskinar og heilsprø vitskapsmenn og mystikarar, i det heile overveldande for auge og øyre. Og midt mellom alle dei flinke barnestjernene kjem òg dei to vaksne skodespelarane, ei velopplagt Oddrun Valestrand som eksentriske Irina og Mareike Wang som den vonde Nana i ein eldsprutande prestasjon.

I skumlaste laget for dei minste i salen er nok dette, men for det velrenommerte barneteatret i Stavanger kunne neppe nokon åremålsfest vere festlegare. I år fyller dei 60 år.

Bent Kvalvik