Utstilling om Vinje

Torsdag 5. april opna utstillinga Journalistikken – fridomens sjanger? A.O. Vinje og norsk pressehistorie på Nasjonalbiblioteket. Utstillinga hentar fram viktige vitnesbyrd frå pressehistoria til det moderne Noreg. Ho tek føre seg den fyrste store norske journalisten, 200-årsjubilanten Vinje, og prinsipperklæringane hans og går fram til dagens mediesituasjon med falske nyheiter.

«Aasmund Olavsson Vinje er blitt kalla vårt første journalistiske geni», seier fagansvarleg for utstillinga Trond Haugen og held fram: «Alt i 1851 la Vinje fram ein programartikkel om journalistikkens historiske og demokratiske grunnlag. Prinsippa han la fram, er framleis høgst relevante og gyldige for norsk presse i dag.»

Bøker i april

Forlaga har alt kome med smakebitar på kva bokmånaden april har å by på. Vi nemner nokre titlar her. Samlaget lanserer ei ny bok av Patti Smith: Om å skrive. Når vi er inne på nynorsk, må Sandharpesongar av Kjartan Fløgstad nemnast. Forlaget er Gyldendal. Vi nemner òg ei bokmålsbok. Gaute Heivoll lanserer denne veka ein barnebokserie. Heivoll er ein alvorleg forfattar, og barnebøkene hans er òg alvorlege: Serien tek føre seg dei sju dødssyndene.

Ferrante på TV

Ferrantes fyrste roman i bestseljarserien Napoli-kvartetten kjem snart på fjernsynet. Den amerikanske betal-TV-kanalen HBO kunngjorde i fjor at dei skulle lage ein miniserie av boka, og bestilte åtte episodar. Produksjonen er alt i gang i Italia, og HBO har gjeve sjåarane eit fyrste blikk av Mi briljante venninne. Serien blir regissert av Saverio Costanzo. Samlaget har denne kommentaren til bok365.no: «Vi var fleire i forlaget som fekk gåsehud av dei fyrste bileta av Elena og Lila som HBO sleppte førre veke», seier Karin Helgøy i Samlaget.

ronny@dagogtid.no