Jazz / samtids­musikk

Skarbø skulekorps:

Dugnad

Signe Emmeluth, altsaks og vokal; Eirik Hegdal, C-melodi-, alt- og barytonsaks og klarinett; Stian Omenås, trompet; Ivar Grydeland, pedal steel og gitarar; Chris Holm, bass; Øyvind Skarbø, trommer, perkusjon, tangentinstrument, gitar, vibrafon, trommemaskin og vokal; Klaus Holm, klarinett, alt- og barytonsaks (1,8,11,13); Thomas Dahl, (4,6); Guoste Tamulynaite, piano og vokal (5,11); Elia Müftüoglu Skarbø, vokal (11); Øyvind Torvund, synth (14). HUBRO  HUBROCD2641

Øyvind Skarbø, dei faste medlemene og gjestene i skulekorpset freser igjennom 14 låtar på 30 minuttar og 7 sekundar, og ved første gjennomlytting stiller ein seg spørsmålet – kva er poenget? Spørsmålet byggjer på premissen at ein ikkje kan samla eit så råsterkt lag utan å gje dei solistisk armslag, men Skarbø ville ikkje vore seg sjølv om han ikkje tok skulekorpset på stadig nye eventyr.

Dette er ikkje eit ensemble som forskar i og utviklar 14 frittståande komposisjonar. Dugnad er eit opus der dei fjorten delane er med på å fargeleggja omgjevnadene. Når grooven har festa seg og skapt forventning, hastar Skarbø vidare. I det lengste kuttet på plata, «Triple F», har han spleisa kontrasterande kompositoriske fragment inn i ein kontemplativ ballade.

Skarbø er musikalsk altetande. Rock, fusion, disko, afrobeat, frijazz og støy. Det er plass til alt i det musikalske universet til Skarbø, men det skal han ha – skulekorpset er ikkje ein anonym reiskap i Skarbøs hender. Signe Emmeluth er så til dei grader til å kjenna att i ei kort, intens stund i «PGA The Fruit», og Thomas Dahls gjesting på «Triple F» er heller ikkje vanskeleg å identifisera, men dette er først og fremst den galne verda til Skarbø. Eg vedgår at eg likar det eg høyrer.

Lars Mossefinn

Lars Mossefinn er lærar ved Voss gymnas og fast jazzmeldar i Dag og Tid.