Det er lite tvil om at Joan Wasser – den amerikanske artisten fleire vil kjenne som Joan as Police Woman – trygt kan unne seg ei såkalla retrospektiv utgiving, 13 år etter debuten Real Life, som har vorte følgd av seks sterke og stilistisk uhyre varierte studioalbum.

No er Joanthology her, ei fin oppsummering og påminning, og med litt av eit omfang – heile 43 songar finst på utgåva eg har fått tilsend, tre timar og eit kvarter med musikk. Samla slik får det heile nesten noko overveldande over seg.

Nokre obligatoriske nye spor finst også i materialet. Om nokon skulle kunne ta på seg å finne vegen tilbake til Prince-hiten «Kiss», så er det vel Joan as Police Woman. Versjonen hennar av Talk Talk-låten «Myrrhman» er også med, sist høyrd på tribute-plata Spirit of Talk Talk (2012), og den tredje plata på Joanthology inneheld eit konsertopptak gjort i BBC. I sommar turnerer Joan as Police Woman i Storbritannia og i Irland.

Øyvind Vågnes