Den gjennomkommersialiserte musikkindustrien har fått boltre seg fritt med ein sjellaus country-turisme i store delar av det sentrale Nashville, men for musikkelskarar finst det likevel oasar i ørkenen som gjer det verdt turen. Mellom desse er platesjappa til Jack White, Third Man Store, som kuraterer akkurat dei rette prosjekta og lagar strålande små konsertplater i butikken – mellom dei ein fersk EP av Bill Callahan – gjennom selskapet Third Man Records.

Det finst ei sjappe i Nashville, og ei i Detroit, og i eit hjørne i førstnemnde står den vesle automaten du kan spele inn musikk i, og få det ut der og då, som eit lite stykke vinyl. The Third Man Booth fekk godt med merksemd då Neil Young spela inn A Letter Home (2014) i den renoverte boksen frå 1949.

Jack White heldt konsert i Nashville for eit par dagar sidan, og han snakka om butikken i eit større intervju med bladet Nashville Scene. Då kom det fram at staben i Third Man Store nyleg vart kutta kraftig ned etter ti års levetid. White hadde tilbydd så uamerikanske ting som ei brukbar minimumsløn og helseforsikring til dei tilsette. Det er ikkje i dette rommet White tener pengane sine, men lat oss håpe han tenkjer på tapsprosjektet som verneverdig.

Øyvind Vågnes