Verdsmusikk

Midori Takada og Lafawndah:

Le Renard Bleu

K7

Den japanske perkusjonisten Midori Takata og den Paris-baserte, egyptisk-iransk-engelske songaren Lafawndah gav for kort tid sidan ut EP-en Le Renard Bleu, eit musikalsk samarbeidsprosjekt verdsaltet aldri har høyrt maken til.

Hypnotiske marimba-arpeggio, polyrytmisk tromming og bjelleklang produsert med ein «AquaSonic Waterphone» – ein moderne idiofon (melodisk perkusjonsinstrument) som blei funnen opp på slutten av 60-åra, etter at skaparen Richard Waters oppdaga ei tibetansk tromme med vatn i resonanskammeret – fortel, i kombinasjon med ei stemme som saumlaust skiftar mellom klassiske og R&B-uttrykk, ei laus soge om skuggabaldur, den islandske blå reven som kjem til verda når ein katt og ein rev parar seg. Dette er ein fasettert og kompleks – og dessutan både avslappande og medrivande – komposisjon på 20 minutt med tilhøyrande video som ein kan søke opp på Youtube.

Midori Takada er elles mest kjend for den segnomspunne og – inntil ho blei utgjeven på nytt av plateselskapet Palto Flats i fjor – sjeldne plata Through The Looking Glass (1983). Denne surrealistiske musikalske utflukta tek utgangspunkt i Lewis Carrolls oppfølgjar til Alice i Eventyrland, og læt som ei kryssing av minimalistisk samtidsmusikk, afrikansk og asiatisk folkemusikk og progrock. Lesaren skuldar øyro sine eit møte med dette.

Rasmus Hungnes

Rasmus Hungnes er musikar og fast musikkmeldar i Dag og Tid.