Hiphop

Megan Thee Stallion:

Thot Shit

300 Entertainment

Den framifrå rapparen Megan Thee Stallion har ikkje lege på latsida sidan det førre albumet hennar, Good News, kom ut. Dei siste månadene har ho til dømes bidrege til Beautiful Mistakes av popgruppa Maroon 5 (ei låt som utanom Stallions rap er ganske stygg), og for tida er det furore – igjen – blant keisame konservative synsarar på grunn av den nye singelen med tilhøyrande video, «Thot Shit».

Det har blitt ein slags tradisjon for Stallion å levere eit sumarleg varmesjokk i form av hardtslåande rap og frimodig dans. I 2019 samarbeidde ho med Nicki Minaj om songen «Hot Girl Summer», og i fjor var ho med på Cardi Bs kontroversgenererande singel og video WAP, ei frigjerande feiring av feminin kropp og seksualitet.

Konservative miso­-
gynistar som Fox News-personlegdomen Tucker Carlson kunne ikkje tole å sjå (svarte) kvinner ta kontroll over eigen kropp, og tolka mangelen på sexnegativitet som eit teikn på undergangen, noko som gjorde det heile endå meir underhaldande.

Ein god låt var det òg, og årets «Thot Shit» er minst like medrivande med Stallions skarpe tunge og drivande beat. I videoen får vi sjå ein innbiten, bleik politikar spreie netthat mot Stallion og dei frodige dansarane hennar. Deretter, som alle veit, set han i gang med hyklersk sjølvtilfredsstilling, og måten «Thot Shit» direkte tar tak i den synoptiske syntaksfeilen som oppstår når eit dobbeltmoralsk menneskesyn møter kropp, seksualitet og livet sjølv, er svært treffande. Videoen snur makta på hovudet og minner oss om at det er essensielle arbeidsgrupper som butikktilsette og avfallsarbeidarar som held samfunnet i drift.

Rasmus Hungnes

Rasmus Hungnes er kunstnar, musikar og fast musikkmeldar i Dag og Tid.