Jazz

Jon Eberson/Sigurd Hole:

Play Ballads

Jon Eberson, gitar og Sigurd Hole, bass.
JEG Records JEG006

Jon Eberson og Sigurd Hole møtte kvarandre på Norges musikkhøgskole i 2002, den eine som lærar og den andre som student. Dei byrja å spela saman i Jon Eberson Group med Hilde Marie Kjersem på vokal. Tre plater har dei gjeve ut så langt. Langt meir hemmeleg er det at Eberson og Hole har hatt ein duo som spelar standardrepertoaret, men nett her om dagen kom plata med den nøkterne tittelen Play Ballads.

«Bluesmumrikken»

Det er nett det dei gjer, spelar balladar, og langt dei fleste er frå den store amerikanske songboka – med unnatak av erkenorske «Blåmann» og Eberson-originalen «Bluesmumrikken». Sistnemnde er, som tittelen tyder på, ein stødig bluesballade som dei to tek i mange ulike retningar.

Raud tråd

Den raude og blå tråden gjennom heile plata er den meditative roen kombinert med ein genuin utforskartrong. Solistisk leverer Eberson både dei fleste og lengste bidraga, men båe vartar opp med overraskande og interessante innfallsvinklar til improvisasjonane. Samspelet er samstundes både tett og laust. Instrumentklangen er både nær og mektig med mykje romklang. Favorittane kjem som perler på ei snor. Det spørst kva aspekt ved musikken ein vektlegg, men i skrivande stund er eg totalt opp i undring over «My Man’s Gone Now». Eg vågar eit veddemål på at denne er å finna blant dei som er nominerte til Spellemann i år.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.