CD

Franz Schubert, Friedrich Burgmüller:

Die Nacht

Anja Lechner, cello; Pablo Márquez, gitar. ECM 2018

Den eine komponisten denne duoen gjev oss, er svært kjend, den andre ditto ukjend. Likevel greier dei å spela verka til den kjende på ein ukjend måte – i eigne omarbeidingar for cello og gitar. Winterreise, D 911, er wienaren Franz Schuberts (1797–1828) mest fengslande syklus for song og klaver. Arrangementet av «Lirekassemannen», den siste songen frå samlinga, fungerer best, for duoen får godt fram Schuberts imitasjon av den kvervande lirekasselyden. Like fin er versjonen av «Arpeggione»-sonaten i a-moll, D 821, som har den for Schubert så typiske ambivalensen mellom melankoli og eleganse. Og stykka til den ukjende komponisten? Tyske Friedrich Burgmüllers (1806–1874) 3 nocturnes er faktisk originalmusikk for cello og gitar. Stykka er truskuldig romantiske i uttrykket – verkeleg godt er berre det fyrste av dei, der Burgmüller får fram klanglege bilete av nattleg lengt.

Sjur Haga Bringeland